J.K ROWLING (Harry Potter Cauk Tialtu)

J.K ROWLING

(Harry Potter Cauk Tialtu)

J.K Rowling (A mintling cu Joanne Kathleen Rowling a si) July 31, 1965 ah England ram Glouccestershire ramkulh Yate khua ah a chuak. Amah nakin kumhnih a ngakchiami naunu Danne a ngei. J.K Rowling nih a ngakchia lio kong cu hitihin a chim.

“Ka ngakchia lio kha a rak nuam tuk. A caan caan ah kan khan chung i ka hawile nih ka min hi pa min a si tiin an ka capo tawn i ka thin a hung i ka rak tap tawn”.

Rowling hi a ngakchiat lio tein catial thiam si duhnak a ngeimi a si. Ngakchia dang hna cu siibawi, engineer si kan duh an ti lioah Rowling nih cun catial thiam si ka duh tiah a ti. A ngakchiat lio tein a caan ah a lungah a chuakmi tuanbia tete a tial i a naunu Danne cu a relter tawn. Kumruk a si ah tuanbia cauk pakhat a tial.

“Ka tialmi tuanbia cu saveh kong a si. Ka nu nih a rel i a tha ngai, tiah a ka thangthat. Ka nu nih a ka thangthat ruangah catial ka duhnak a ngan chinchin. Hi ka tialmi hi cauk in ka chuah lai tiah ka nu cu ka chimh i zeihmanh chim loin a merh. Zeiruangah dah mahti khan ka nu sinah ka chim hnga ka thei lo. Ka lung chungah a ummi kha ka hei chimh ko” tiah Rowling nih a chim. Cu nih cun Rowling hi a ngakchiat lio tein catial thiam si dingin duhnak nganpi a rak ngei cang ti kha a langhter.

Nikhat khat ah cun catial thiam ka si lai tiah zumhnak  zumhnak a ngeihtertu hi a hawinu Shine a si. Hi kong he pehtlai in Rowling nih hitihin a chim.

“Nikhat khat ah cun catial thiam minthang na si lai, tiah Shine nih a ka ti, a bia nih thazaang tampi a ka pek pinah ka si hrimhrim lai tiah zumhnak zong a ka ngeihter. Ka tialmi ca hi a rel i thuk piin a ruah hnuah a ruahnak a ka pek tawn. Anih hi zeitikhmanh ah capo a hmangmi a si lo caah a chimmi ka zumh khunnak a si”.

Rowling cu 1983 ah High School a dih i Oxford University ah kainak a tuah nain an cohlang lo. Cutikah a nu le pa fialnak bangin Exeter College ah Franch holh a cawng. Kum thum a kai hnuah Franch holh in dikari a lak. Amnesty International ah rian a tuan nain a huam phun a si lo caah kumkhat lawng a tuan i a chuak than.

Nikhat cu a tlangval pa umnak Mancester ah a va tlawng i amah lawngin tlanglawng aa cit i a umnak London ah a rak kir. Lampi ah an tlanglawng a rawk i nidang nakin suimilam pali an rau. Cuti i tlanglawng cung i a thut ko lioah cun Harry Potter tuanbia hi a lung chungah “duk” tiah a hung chuak. Tlanglawng a rawh chung suimilam pali chung vialte cu a lung chungah Harry Potter tuanbia tial ding kha pakhat hnu pakhat in an hung lang. Vun tial colh a duh tuk nain zeihman catialnak thilri aa ken lo.

“Mah lioah khan catialnak a um lo caah a ing a puang tuk. Ka pawng i a ummi hna sinah Ballpen vun hlan ding kha ka ngamh bak lo, ka ning a zak tuk” tiah Rowling nih a chim. Cuticun London i an inn a phak lecangka in Harry Potter tuanbia cu a tial colh.

Kum 1990 ah nu a thi. Rowling hi a nu he aa tlaihchan tukmi an si tikah a nu a thih cu a ngaih a chia tuk hringhran. A nu zunngaihnak a dam deuh khawhnak dingah tiin 1991 ah Rowling cu Porturkey ah a kal i sianginn ah Mirangca chimtu a tuan. Cuka i a tuan lioah TV Thawngthanhnak i thawnglatu a simi Jorge Arantes he an i uar i 1992, October ah an i um. Fanu pakhat Jessica an ngei. Asinain kumhnih hnuah an i then than. A pasal nih cun a thawl hna caah kumkhat lawng a simi a fanu Jessica he hmundang ah an kal. 

Rowling le a fanu cu 1993, December ah England ah an kir than i Edinburg khua chung i inn-khan hmete ah an um. Cuticun a dih rih lomi Harry Potter tuanbia tial cu a peh than. Rian a ngeih lo caah cozah bawmhnak tlawmte i bochan in khua an sa. Khuasik a phak tikah innchung lumternak onnak ah a dih dingmi meiman pek ding kan ngei lai lo tiin a naunu pasal lakphak dawr pahnih, Nicolson’s Cafe le Elephant House ah zingin mui tiang ca a tial tawn. Ca a tial chungah a fanu cu a nu pawng i thutdan sau cungah aa hngilh tawn. A hran a tialmi kha inn ah catialnak seh in a tial than. Catialnak computer zong aa cawk kho lo. A caan ah cun a lungthin a der tuk ve tawn. Asinain a catialmi ah khan a lungthin dihlak a pek i a lungthin dernak a dam than tawn.

A catial cu 1995 ah a lim. Cu a limmi cu Harry Potter tuanba cauk a hmasa bik a simi “HAARY POTTER AND THE PHILOSOPHER’S STONE” kha a si. Lungtho ngai in a tialmi cu cauk chuahtu sinah a hei kuat. Zarhhnih a rauh hnuah cauk chuahtu sinin cakuat a rak phan. Cu cakuat ah cun na tialmi cu ngakchia nih an duh phun a si lo, cauk ah chuah tlak zong a si lo, tiah aa tial. Rowling cu a lung a rawk tuk i nithum chung rawl zong a ei huam lo. Kum nga chung thi dengmang in a tial vemi, cauk chuah tlak a si lo an timi kha a celh in a celh lo. 

Zarhkhat a rauh hnuah a lungthin zong a hung dam deuh cang i zeitindah ka tuah lai timi a ruat. A catialmi cu hnawmphung ah maw ka hlonh lai, asiloah mei in dah ka khangh lai? Cuti ka tuah ahcun kumnga chung ka retheihnak vialte pakpalawng ah a cang lai, ti a ruat. Ka tialmi hi a tha tuk, a bik in mino nih an duh tuk lai ti kha Rowling nih cun a zumh peng. Cuticun a ca cu cauk chuahtu dang sinah a kuat than. Tutan tal hi cu chuah duh hram hna seh tiah thla a cam.

Zarhthum a rauh hnuah cauk chuahtu sinin cakuat a rak phan. Thinphang pah, i ngaih pah nawn khin cakuat cu a vun samh. Hmasa bantuk thiamthiam, na ca hi a sau tuk, ngakchia nih an duh lai lo, ti a si hoi. Asinain cakuat a donghnak ah “I ZUAM RIH” timi thapeknak aa tel. Hmasa bantuk khan cun a lung a rawk ti lo, tuar khawhnak thazaang a ngei deuh cang. Zarkhat hnuah cauk chuahtu dang sinah a kuat than, cu zong cu a hlawhtling hoi lo. Rowling cu a ngaih a chia tuk.

Asinain lungdong lo tein cauk chuahtu pakhat hnu pakhat in a kuat hna. Voi tampi hnon a tong (Voi 12 tiang a tong). A naunu Dianne nih a rak len i tha a pek lengmang. Kumkhat a rauh cang pinah cauk chuahtu ahomanh nih an catialmi an chuahpiak duh lo i a lung a dong cang. Cuti i lungdong in a um lioah nikhat cu Boombury Cauk chuahnak nih na cauk tialmi chuah dingin kan lung a tling, tiah ca an vun kuat. Cu zong cu tuanvo ngeitu hna nih an duh ruangah si loin cauk chuahnak company a ngeitu a fanu Alice (kum 8) nih tlawmpal a rel i a duh tuk caah a pa kha cauk in chuah ko tiah a ti peng ruangah a si. Bloombury i Editor Barry Cunningham nih Rowling cu hmasa ah Pound (Britain tangka) 1,500 kan in pek lai i a dang cu cauk zuarmi zoh in kan in pek than lai, tiah a chimh. Rowling cu aa lawm tuk i a au a khuang, aa hlok. A pawngah a thumi a fanu nih ka nu hi a hrut cang rua, tiah a ruah.

A rauh hlanah Harry Potter tuanbia cauk cu a hung chuak. Uk 1,000 lawng an chuah. Cucu a dih zau i a dang an nam than. Mipi nih an duh tuk caah atu le atu an nam than lengmang. Cuticun Harry Potter cauk cu Britain ram ah zuar khawh bikmi cauk a hung si. Catialtu J.K Rowling cu catial thiam minthang ah aa chuah. Cun America i cauk chuahtu company a simi Scholastic nih Rowling cu Pound 100,000 pek in a cauk kha America ramchungah anmah lawng chuahnak nawl an hal. Cu lawng a si lo. Hollywood muicawl thlaknak company Warner Bros nih Harry Potter cauk cu muicawl thlak dingah Dollar a nuai in an hal. Cuticun J.K Rowling cu ni nikhat ah minthang le mirum ah aa chuah.  Pakhatnak Harry Potter cauk hnuah Harry Potter a peh zeimawzat a chuah rih. Cu zong cu Warner Bros company nih muicawl in an thlak. 

A pasarihnak, asiloah a hnubik Harry Potter tuanbia cauk a simi “Harry Potter and the Deadly Hallows” timi cu Dec 21, 2006 ah a tial dih. Cu hnu cun Harry Potter cauk a tial ti lo. Harry Potter cauk cu Britain le ramdang ah an zuarmi dihlak hi Nuai 11 leng a si. A cauk man in tangka tampi a hmuh pinah muicawlnak man zong tampi a hmuh. 

J.K Rowling cu Robert Balbraith timi min in upa deuh rel dingah cauk tial a peh. Hmasa ahcun an manh tuk lo nain J.K Rowling tialmi a si ti an theih cun tampi an zuar khawh than.

Rowling a pahnihnak a pasal Neil Murray le a fanu pathum hna he Scotland ram ah nuam tein khua an sa.

 

Cinkentlak a bia cheukhat:

  1. Kan nunnak ahhin sunghnak cu ton hrimhrim a hau. Sunghnak ton lo dingin zeizong vialte ah ralring tukin kan um pengah cun nuamhnak timi a um kho ti lo.
  2. Ka nunnak ah khur a thuk tukmi chung i lung cungah ka tla bal ko. Asinain cu lung cungah cun dir in kan nunnak hi ka sersiam than.
  3. A ral a thami hna caah vawleicungah a si kho lomi a um bal lo.
  4. Kan nunnak ah si kan duhmi kan tuah khawhmi khi a fekmi biakhiahnak ruangah a si, thiamnak ruangah a si lo.
  5. Zuamnak le van hi ka zumh ko, asinain zuamnak um loin zeitik hmanh ah mivantha na si kho lai lo.

Na lungsau ahcun nihkhat khat ah na caah hlawhtlinnak kutka aa ong hrimhrim lai.

 

 

Leave a Comment

Your email address will not be published. Required fields are marked *