JULY 21 IN SIANGINN ON A SI LAI

A ra laimi July 21 in tangkua le tanghra in a tanglei sianginn hna cu on a si lai tiah fimcawnnak lei bawi U Ko Lay Win nih a chim.

Covid-19 ruangah kumdang bantukin June thla ah sianginn on a si lai lo. Covid-19 zawtnak in i runvennak dingah a hlankan in timtuahnak a herh caah sianginn on caan July 21 ah an thawnnak a si.

“Sianginn pakhat cio ah Social Distancing zeitindah kan tuah lai timi kha mah le sianginn uktu nih khua an khan cio. Sianginn ah zulh ding tete a um len lai. Ca cawnnak khaan remh ding, dinh caan ah thutdir le tlonlenning, tibantuk kha tuanvo ngeitu hna nih an tuah cuahmah lio a si. A rauh hlanah mipi sinah theihternak kan tuah lai” tiah U Ko Lay Win nih a chim.

High School, Middle School le Primay School hna cu July le August thla chungah on an si lai. Tanghra sungh-awn hi cu kumdang awn bangin tlawmpal a tlai deuh lai. July thla dih, August thla thokka hrawngah a chuak men lai. A fiang rih lo. Rian a dih le dih lo nih lai a rel lai. A dang catang sungh-awn hi cu June chungah a chuak ko lai, tiah theih a si.

Ramchung dihlak ahhin sianginn 4800 leng a um. Hmasa ah cun Primary sianginn in on hmasa ding ti a si nain Rampi Ruahnak Petu Suh Kyi le fimcawnnak le upa hna online in tonbiaruahnak ah High School in on hmasa dingah an let thanmi a si.

Social Distancing zulhphung bantukin pe 34 in pe 24 a kaumi khaan ah siangngakchia 20 lawng cawnter a si lai. Cun kumdang ah cun Private sianginn pawl cu Cozah sianginn on hlan thlakhat ah an on tawn nain tu kum cu cozah sianginn on caan lawngah an on ve lai tiah theih a si.

Sianginn on than ding kongah siangngakchia nu le pa hna cu thinphang in an um. Asinain fimcawnnak zung nih cun sianginn ah hlat deuh in thutter ding, ca cawnnak khaan remh ding, kut tawlnak ti le sahpiat/asiloah kut thianhnak sii a lak in chiah piak ding, taklinh tahnak seh le hmur huh chiah ding le zawtnak i chawnh lo dingin a dang timhtuahnak tampi kan ngei ko tiah U Ko Lay Win nih a chim.

“Rampi tangka chungin hman ding an kan pekmi a tam ngai ko, cun Global partnership For Education nih US $ 15 Million an kan bawmh lai. June thla thokka hrawngah kan hmuh lai. EU ah bawmh kan halmi Euro 35 Million zong a um. Cun World Bank le GPEA ah kan cawimi tangka zong a um ko. Mah vialte hi fimcawnnak caah kan hman hna lai” tiah U Ko Lay Win nih fianternak a tuah.

Sianginn ah siangngakchia pakhat khat an si sual ahcun a dang tein chiahnak khaan zong tuah a si, tiah a chim rih. Cun a zawmi an um sual tikah a rannak in siizung ah kalpi kho dingin timhtuahnak kan ngei, tiah a chim.

Source: BBC Burmese

Leave a Comment

Your email address will not be published. Required fields are marked *