HNANGAMNAK TIMI CU

HNANGAMNAK TIMI CU

Ram pakhat ahhin siangpahrang a rak um. Nikhat cu ruah lo piin lungretheihnak nih a tlunh. Cutikah nifatin, zantin in a lungre a thei peng, tihmi le phanmi a ngei peng. A kuttang bawi hna nih siangpahrang pa aa lawmh khawh nak ding le a hna  a ngam khawhnak dingah a phunphun in an i zuam lengmang nain zeihman a thahnem lo.

A kuttang bawi pakhat nih ramchung i zuksuaithiam vialte kan auh hna lai i siangpahrang pa a hnangamtertu ding zuk suai kan zuamter hna lai. Siangpahrang pa nih a duhmi, a hna a ngamtertu zuk a um ahcun a suaitu kha laksawng tampi kan pek lai, tiah ruahnak a chuahpi. Bawi dang zong nih an lungtlin caah ramchung i zuksuaithiam vialte thawng an thanh hna.

Ni an khiahmi a phak tikah zuksuaithiam tampi nih an zuksuaimi cu siangpahrang hmaiah an rak chuahpi. An zuksuaimi cu aa dawh tukmi fingtlang, hringdul in a ummi nelrawn, rili, tiva, cungah a zuangmi varun tibantuk an si. Siangpahrang pa nih cun pakhat hnu pakhat in a zoh i pakhat hmanh a lungtlingmi an um lo.

A donghnak ah an ramchung i sifak bik nuhmeinu fapa nih a zuksuaimi a rak chuahpi ve. Midang nih cun an nihsawh i kanmah suaimi hmanh siangpahrang nih a duh lo, nangmah suaimi cu zeitinhme a duh khawh lai ee, tiah nek ngai khin an ti len. A zuksuaimi an vun zoh i “hahaha…” tiah an ni. A ruang cu thlichia le totho a hran lio, thingkung le ramkung vialte thlichia nih khiah dih a timh lio, fak taktak in ruah aa huai lio zuk a si. Fingtlang, rili le nelrawn zuk dawhdawh hna hmanh nih siangpahrang lung an tong lo. Zeitinhme thlichia a hran lio le ruah a sur lio zuk nih cun siangpahrang lung cu a ton lai ee, tiah an zai.

Asinain siangpahrang nih a mit thep loin a zoh peng, cutikah a pawng i a kuttang bawi le zuksuaithiam hna cu an khuaruah a har. Siangpahrang pa cu a hung dir i hitihin a thanh.

“Mah zuk lawnglawng hi ka lung a ka tong i ka lungretheihnak chungin a ka luattertu a si. Mah zuk a suaitu cu laksawng ah ram kaupi pek si seh, cun ka siangpahrang inn ah bawi ngan pakhat ah chiah siseh”.

Mipi cu an lau, an khuaruah a har tuk. Zeiruangah dah mah zuk ngelce hi siangpahrang nih a duh hnga, tiah pakhat le pakhat le an i ceih. Cutikah siangpahrang nih hitihin chimfiannak a tuah.

“Midang nan suaimi zuk cu aa dawhnak le a thatnak lei lawngte in pei a si cu! Nunnak timi hi a thami lawngte a si bal lo cu teh. Asinain mah zuk hi cu thlichia, totho le ruahsur lakah hnangam tein lungpi tangah a thumi vate zuk a si. Harnak le buainak, lungretheihnak le vansannak lak zongah a kan phentu le vengtu Pathian a um ko, ti rak zumh, rak i bochan hi hnangamnak cu a rak si. Nunnak timi hi a thatnak lei lawngte in rak hman kaa tim, cu ruangah lungretheih zawtnak nih a ka tlunh. Asinain mah zuk ka hmuh tikah nunnak timi sullam kaa fiang. Hnangamnak timi hi tih le phan awk a um lomi nelrawn ah thadam ngai in kal khi a si lo, tlangsang horkuang le tihphan ding tampi lak zongah phentu Lungpi Pathian i bochan khawh khi a si”.

Nu le pa, u le nau hawikom dawt hna nifatin kan nunnak ahhin a thatnak le a nuamhnak lei lawng in khua kan ruah, kan tuaktan, kan kawl a si ahcun kan lungre a thei peng ko lai. Asinain kan tonmi harnak le buainak chungin Pathian hmai kan kawl i Amah kan i bochan ahcun, cucu hnangamnak timi cu a si.

 

Leave a Comment

Your email address will not be published. Required fields are marked *