Lai Thilthuam le Laica Thawhkehna ( Tin Mang )

Lai Thilthuam le Laica Thawhkehna
Tin Mang
Laica
“Laica (Hakha holh)tuah a si hlan ah Tedim peng Sizin(Sizaang)holh ca cu Mirang ralbawi.Randall nih 1891 kum ah a tuah piak hna.Hakha Laica cu 1894 ah Mirang ralkap sibawi.A.G.E Newland nih a tuah ve.Tedim ah Pau Cin Hau(1859-1948)cu a mang ah pathian nih cauk a pek.Cu thawk cun Pau Cin Hau nih ca phunkhat a tuah i catial a thawk.Cu ca cu Laipianca ti a si.Lairam siangbawite nih hi ca hi Laimi nih mah tein tuahmi ca asi,zei dah a lawh hnga ti hngalh duh caah Bible ca chung i,”Tlangcung Cawnpiaknak kha,Laipianca in 1936 kum ah British and Foreign Bible Society(Burma Agency)”nih an rak tial.A sinain hi ca hi Laimi sin ah a karh kho lo.Lai ram uktu Mirang nih Laimi holh phun a tam tuk caah Falam Laizo holh lawng in cacawn siseh an rak ti.Siangbawi pa Rev.Cope nih a duh lo.Cucaah Lairam uktu Colonel Burne nih 1924 ah Rev.Cope kha a vaton i Tedim ah Kamhau holh,Hakha le Falam ah Laizo holh cawn ding in a va chimh.Holh phun hnih in Laica cawn cu thawk a rak sinain a hnu ahcun Hakha ah Hakha holh in cawnter a si ve.”1 Nihin ahcun Laica(Hakha holh)cu kum 90 leng a si ve cang. Lai Bible le Lai Dictionary zong kan ngei cang.
Lai thilthuam
Lai thilthuam thawhkehnak kong hi fiang tein Mirang nih an rak tialmi hmuh khawh a si lo. Mr.Tuck le Mr.Carey nih 1894 kum in an rak tialmi(Chin Hills)cauk hi kan Laimi caah cun kan tuanbia(History)cauk a si ko. Cu cauk chung ah hi ti hin an tial:-“Tlangcung ram kan va lak lio i ramdang thilpuan an hman hlan ah hin, Laimi nih thil hrukmi phun hnih lawnglawng an ngei. Pakhat cu a leng angki fualpi le a dang pakhat cu biar a si.Hakha le thlanglei zalong in a ummi mi pawl i an puan cu puu in tahmi a si.Anmah tein tahmi a si. Thawi a phunphun in an tamh.A thilri a man fah lawng a si lo,a khul a rangbilkmi le a tak zungzalmi Hakha nu hmanh nih nifate a tah ahhin kum khat a rau.(Cawngnak puan a si).”² Tuanbia(legend):-“Lai thilthuam cu Zotung peng Sepi khua in a rak thawkhmasa tiah an chim tawn. Sepi khuami Pu Tho Khe cu an khua pawng Letsava ah sur a chep.Cu lio ah ngaknu a dawh ngaimi pakhat ti chung in a hung chuak i a tlaih.Khuachianu nihcun a umnak ah a kalpi i Pu.Tho Khe cu inn lei ah a kir kho ti lo.Khuami nih an kawl lengmang i an hmuh tilo caah a thi ko cang tiin Lawki phung in lung an donh piak.
Kum thum chung khuachianu he an um hnu ah a khua le ram a ngaituk caah khualei tlun a duhnak kong a chimh lengmang.A donghnak ah khuachianu nih kan sining vialte hi a ho hmanh ka chim hna lai lo tiah bia naa kamh lawng ah nakal kho tiah a rak ti.Na chim sual ahcun na thi lai tiah bia a rak tiam. Pu Tho Khe cu bia aa kam hnu ah khua lei ah a tlung.Khuami vialte an i lawmh tuk caah inn khat in an topi i khua zei ahdah na um? tiah an hal colh.Thih a tih caah a chim duh hna lo nain um thiam loin an hal lengmang caah ka chim ni cu ka thih ni a si lai caah khuami vialte chuak dih ulaw kan chimh hna lai a ti hna.An khuapi in an chuah hnu ah Pu.Tho Khe nih khuachianu he an umnak kong cu a chimh hna.A thi colh ve.
A ruak cu ni thum le zaan thum an suan.Ruak hummi an ngu dih kar ah khuachianu nih ruak a rak humh ve i ruak pawng in a tap. Cucu nu hmei nu nih a hmuh i mipi a chimh hna ahcun khuachianu cu a lo diam cang.A ho hmanh nih an zum lo.A donghnak zan ah khuachianu cu ruak humh ah a ra nolh ve. Mipi cu an ngu dih hoi i.Khuachianu cu Arkhuan hlan ah kir ding a si ko nain a donghnak zaan a si caah Pu.Tho Khe sian loin Arkhuan tiang a um sual.Arkhuan thawng a theih in a lau tuk i a tlik nak ah khuhsi sawngkhoi a philh tak.Cu sawngkhoi cu Lungngo bawi nih a lakter hna i an khua i thiamtah a thaimmi Pi Ria Thein(To Thang nu)kha a zoh ter i a tahter.Cu ti cun Cawnlo/Cawngnak a rak thawhkehnak cu a si.“ ³
Ref:-Muko Mekazin Dec.2006(Ca tialtu:Sayaci.Thang Thai)¹ -2.Chin Hills. 1894(Carey and Tuck)² -3.Muko Mekazin June.2005(Ca tialtu:Ni Za Hmung)³

Leave a Comment

Your email address will not be published. Required fields are marked *