RAKHINE RAMKULH LAIMI AN TAMNAK KHUA AH COZAH RALKAP NIH BOM AN THLAK

RAKHINE RAMKULH LAIMI AN TAMNAK KHUA AH COZAH RALKAP NIH BOM AN THLAK

Rakhine ramkulh Laimi tampi an umnak khua ah cozah ralkap nih March 23, zanlei 2:00 pm hrawngah vanlawng in bom an thlak i minung umnak inn pathum a rawk i minung 9 hliam an tuar tiah theih a si. Cu khua cu Rakhine ramkulh Minpya Myone chungah a ummi Che Taung (ချဲတောင်) a si. Rangon kalnak lampi kam ah a ummi a si.

Chin Sianghleirun Bu (Rakhine) hruaitu pakhat nih “Bom pakhat cu khua chungah a tla. Chungkhar pakhat hna cu rawl an ei lio a si i an inn kam ah bom a tlak ruangah an pali in hliam an tuar. Chungkhar pa bik cu mei nih a kangh caah a au len. Khuami vialte hna cu khur chungah an zam. Khua cungah ralkap vanlawng aa hel peng tikah hliam a tuarmi hna cu kiangkap ah a ummi lawng nih tuamhlawm khawh a si. Lam zong an phih tikah hliam a tuarmi hna hi Minpya siizung ah kan kalpi kho hna lo. Zinglei khan khua pawngah an i kap i rawl zong kan chum ngam lo. Khuami hna cu a nainak bik Laimi an umnak khua pakhat ah an zam” tiah a chim.

Hliam a tuarmi hna lakah kum 7 le kum 8 ngakchia pahnih an i tel. Inn a rawk i hliam a tuarmi chungkhar hna cu  ဦးညွှန့်သာအောင် te chungkhar minung 4, ဦးခင်မောင်တင် te chungkhar minung 6 chungah 4,  ဦးယောင်းဆီး te chungkhar minung 9 chungah 2 hna an si.

Source: DVB News

Leave a Comment

Your email address will not be published. Required fields are marked *