ZEITINDAH KAN I LAWMH KHAWH LAI?

ZEITINDAH KAN I LAWMH KHAWH LAI?

Andrew Barten nih “Lunglawmhnak tello cun nun hi a tling kho lo” tiah a ti. Lungthin aa nuamh lawngah nun timi hi man a ngei! Hmasa ah khan lungthin lawmh / nuamh a thatnak ka theih tawk ka langhter. Asi ahcun hitlukin a thami lungthin lawmhnak cu zeitindah kan ngeih khawh lai? Asiloah zeitindah kan i lawmh khawh lai?

Na thinlung thianter: Lungthin a thiangmi cu lunglawmmi nan va si dah, Pathian kha nan hmuh lai (Mtt 5:8)! Minung hi lungthin a thian lo ahcun i lawmh khawh a si lo. Midang cungah nahchuahnak, ziarngeihnak, hakkauhnak, mitthitnak, hngarnak, lunghrinhnak le zernak ngei hlah, lungchung ah i uam peng hmang fawn hlah, cuticun na lungthin a thiang lai i naa lawm kho lai. 

Midang caah thiltha tuah: Thatnak tuah kha baa hlah usih (Gal 6:9)! Midang caah thiltha kan tuah tikah anmah nak in kanmah kan i lawm deuh tawn. Micheu cu tuahpiakmi, dawtmi le bawmhmi sinak ah khin an i lunghmuih tawn. Asinain lungput tha a ngeimi hna cu anmah nih midang an tuahpiak, an dawt i an bawmh khawhmi ah an i lawm i an i lunghmuih tawn. Sir Philip Sidney (1554-1586) nih “Thiltha tuah hi minung nunnak ah nuamhnak umchun a si (Doing good is the only certainly happy action of a man’s life)” tiah a ti. Cucaah midang caah thil tha tampi in tuah khawh i zuam law naa lawm ko lai.

Midang caah santlaimi si i zuam:  Danmark miphun, Hans Christian Andersen, Midang caah santlaih hi vawleicungah lawmhnak lam umchun a si (To be of use in the world is the only way to be happy)! Lunglawmmi sin a duh ahcun midang caah san a tlaimi le hman awk a thami si i zuam ko.

Mi sualpalhnak ngaihthiam hna: Pathian nih Khrih thawngin an ngaihthiam hna bantukin pakhat le pakhat i ngaihthiam uh (Efe 4:32)! Midang sualpalhnak ngaihthiam hi Baibal nih hmun tampi ah a kan cawnpiakmi a si. Midang nih na cungah sualnak le palhnak an tuahmi na ngaihthiam hna tikah anmah an i lawmh bantukin nangmah zong naa lawm ve hrimrhim lai, ngaihthiammi hna an i lawmh tlukin ngaithiamtu zong i lawmh ve a si. Zeicatiah cun ngaihthiam nak nih cun theipar tha tampi a chuahter tawn.

Mi huatnak lungthin ngei hlah: Huatnak lungthin ngei ti hlah uh (Efe 4:31)! Mi huatnak nih hin lungthin hi a temtawn i lawm kho loin a tuah tawn. Mi huatnak lungthin na ngeih tikah na huatmi hna nakin nangmah kha na re a thei deuh lai i ingpuangin na um lai, asinain na huatmi hna nih cun zeihmanh an thei tung lai lo. Cucaah lawmh na duh ahcun mi huatnak lungthin ngei hlah.

Bawipa i bochan tuah: Lunglawmhnak hi Bawipa i bochannak chungin a chuakmi a si (Isai 30:18)! Zeibantuk thil na ton le zeibantuk dirhmun i na dir zongah Bawipa kha i bochan peng law na lung aa lawm ko lai. 

Na thinhunnak kha daihter zau i zuam: Na thinhunnak kha sualnak chung i an luhpitu si hlah seh, cun na thinhunnak cu nitlak ter hlah (Efe 4:26)! Baibal nih hin thinhun hi a kham lo, ti usihlaw kan palh theng lai lo, Pathian hmanh a thin a hung lengmang cu mu! Asinain thinhunnak i sum lo, asiloah thinhunnak kha daihter zau loin saupi i uam cu a tha lo.  Zeicatiah thinhun ahcun thil tha tuah le bia thalo chim a fawi tuk. Cun thinhunnak daihter hmasa loin lungthin i lawmh khawh a si lo.

A cung i ka langhtermi hna hi keimah hmuhning le ruahning sawhsawh a si lo. Baibal nih a chimmi le vawleicung minthang hna nih an chimmi kan hrawmh vemi hna a si. 

Leave a Comment

Your email address will not be published. Required fields are marked *