LUNGLAWMH A THATNAK

LUNGLAWMH A THATNAK

Gross National Happiness (GNH): Ram pakhat a thanchoning hi Gross Domestic Product (GDP), asiloah Gross National Product (GNP) timi in tah a si. Bhutan siangpahrang Jigme Singye Wangchuck nih 1972 ah thanchonak hi GDP / GNP in tah ti loin GNH in tah ding a si, tiah ruahnak a chuahpi. GNH cu Gross National Happiness ti a si. Ram pakhat a thanchoning kha a ram chung i a ummi rammi hna an i nuamhnak in tah ding, tinak a si. Hi GNH hi July 18, 2008 ah Bhutan cozah nihphunghrampi (the Constitution of Bhutan) chungah an telh cang. Kum 1972 ah British journalist pakhat nih Financial Times i chuah dingah Bombay Airport ah Bhutan siangpahrang Jigme Singye Wangchuck cu GNH kongah bia a rak hal i “Gross National Happiness is more important than Gross National Producttiah a rak leh. Cu ruahnak cu 2011 ah UN General Assembly nih a phungning tein a cohlan i Happiness: towards a holistic approach to development” tiah biakhiahnak (resolution) a tuah. Hi nih hin lungthin nuamh / lawmh hi zeitlukin dah a biapit, ti kha a langhter. India, China le ram dangdang ah Nihnak Phu (Laughing Club) zeimawzat an um. An i tinhmi cu minung lungthin nuamhter a si ko.

Lungthin lawmh/nuamh a thatnak cu a tanglei bantukin kan hmuh khawh!

Pakhatnak: Sii tha bik a si! Phungthlukbia 17:22 ah “Lungthin lawmh hi sii tha a si” tiah kan hmuh.Zeitlukin na taksa a dam ko zongah na lungthin aa lawmh lo ahcun mizaw bantukin uai-ei le zaangder in na um peng ko lai. Asinain na lungthin a dam, aa lawmh ahucn na taksa ah zawtnak um hmanhsehlaw na mithmai a panh kho peng ko lai. Grik philosopher minthang Plato nih “Siibawi hna nih mizaw an zoh tikah an thinlung retheihnak damter hmasa loin zawtnak lawng damter hmasa an i timhmi hi an palhnak a si”tiah a ti. Lungthin a dam hmasa lo ahcun taksa a dam kho lo. Cu ruangah lungthin lawmh hi sii tha bik a si.

Pahnihnak: Hmuhmi thil hna hi a dawhter i man a ngeihter hna! Lungthin lawmh le nuamh tluk in a sunglawimi a um lo. Lungthin a nuamh ti lo hnu ahcun rawlthaw le mehthaw ei zongah kaa a thaw kho lo, ihphah tha le puanlum tang zongah mitkuh a thaw kho lo, pangpar zong khi an i dawhnak a lang kho lo i sui le ngun zong khi an sunlawinak hmuh khawh a si lo. Solomon siangpahrang pa nunnak kha tuak hmanh, mifim, mirum le mi lianngan a si ko nain “zeizong vialte hi pakpalawng a si, nun hi thlitu dawi bantuk men a si” tiah a ti. Ziah Pathian sermi ni le thlapa, arfi, thingkung / ramkung le pangpar phuntling, ramsa / saram le va phuntling hna an sunlawinak le an i dawhnak a hmuh khawh lo? Zeicadah vawleicung tangka le chawva vialte in cawk khawh a si lomi nunnak hi pakpalawng men a si, tiah a ti, zeicadah nunnak a sunlawinak le a man a hmuh khawh ti lo? A ruang cu a lungthin aa lawmh / nuamh khawh ti lo caah a si. Asinain a lungthin aa lawm / nuammi caah cun zeipoah hi a thaw, zeipoah hi an i dawh dih i an sunglawi dih. Lungput tha ngei, asiloah zeithil poah kha a thatnak lei in hmuhzia thiam law na lungthin aa nuam peng lai, a zaangkhai peng lai. A lungthin aa nuamh kho pengmi poah nun man a ngeimi an si. Phundang cun lungthin lawmh / nuamhnak hi zeizong vialte a dawhter tu le man a ngeihter tu a si.

Pathumnak: Ngan a damter, nun a sauter! A lungthin a lawm / nuam kho pengmi hna khi an ngan a dam deuh i an nunkhua zong a sau deuh. Alvin Tofler nih “Nunnak dingah hin lam pakhatte a um, cucu capo lungthin ngeih hi a si” tiah a ti. Cucaah ngandam le nunsau na duh ahcun na lungthin kha nuam tein chiah khawh peng i zuam.

Palinak: Mithmai a panhter! A lungthin aa lawm / nuammi poah cu an mithmai a panh, phundang cun chunglei lungthin lawmh / nuamhnak kha lenglei mithmai panhnak ah a lang. Mithmai panh (smilling face) timi hi thil tetuai a si lo. America miphun, mirum John Davison Rockefeller (1839-1937) nih “Mithmai panh timi hi beidongh, zaang-uainak a tlauter tu niceu dawh a si, nunnak timi hi minung hna nih an tlaihchan khawhnak hnga an herhmi ceunak a si, midang sinah kan pek khawhmi man faak bik le man fawi bik laksawng a si (A smile is the sun that dissipates the clouds of despair, it is just the ray of light that many a soul needs to make life seem preferable to death, it is the cheapest and most valuable gift we can make)” tiah a ti. Mithmai panh, asiloah merh cu a harmi thil a si lo ahopoah nih kan tuah khawhmi a si ko. 

Mithmai panh (smile) ahhin midang hip khawhnak tthawnnak hmual a um. Lenhloi tialthiam Charles Reade (1814-1884) nih cun “Dawhnak cu thawnnak a si i mithmai panh cu hriamnam a si (Beauty is power, a smile is its sword)” tiah a ti. Kan ral teinak dingah thawnnak lawng a za lo, hriamnam tha a herh chih. Cu bantukin midang hip khawhnak dingah mui dawh lawng a ngah lo, mithmai panh a herh. Chinese phungthluk ah “A merh thiam lomi nih dawr hngak hna hlah seh” timi an ngei. Mithmai panh tein mi a zoh i a chawnbia mi hna cu ahopoah nih an fuhpanh deuh ko lai. Khualtlung caah mehthaw bik cu inntek nu mithmai a si, ti a si cu mu! Na khualtlung kha zeitlukin buhthaw le mehthaw hmanh va hunh law na mithmai a chiat ahcun a kaa thaw hrimhrim lai lo. Asinain mithmai panh tein na um ahcun zeibantuk meh na hunh zongah thaw teina ei ko lai. Franklin Beltger nih “Lunglawmhnak mithmai a keng pengmi hna cu zeitik poah ah duh an nung” tiah a ti. Na vunhawng a thatnak cu a dih kho, na muihmai aa dawhnak zong a ziam kho, asinain na lungthin lawmhnak nih a vun hrinchihmi mithmai panhnak nih cun na vunhawng le muihmai a thatnak / aa dawhnak a ziamh dih hnu zongah an dawhter lai.

 

Leave a Comment

Your email address will not be published. Required fields are marked *