PALHNAK HI CAWNPIAKTU THA BIK A SI (A donghnak)

PALHNAK HI CAWNPIAKTU THA BIK A SI (A donhgnak)

Palhnak chimh kha hua hlah, cun na palhnak kha i remh: Micheu cu na palh ti chimh khi kan hua, kan duh lo. Kanmah nih kan palh ko ti kan theih bak ko mi zong khi na palh an kan ti tikah kan thin a hung. Baibal nih cun “Hngalhnak a duhmi nih cun a palh tikah na palh tiah chimh kha a duh, palhnak chimh huat cu hruh a si” tiah a kan cawnpiak (Phungthlukbia 12:1). Palhnak chimtu a ngeimi cu mi vantha an si, kan palhnak a kan chimtu poah hi kan caah cawnpiaktu tha an si. Na palhnak chimh na huat / na duh lo ahcun na palhmi na thei lai lo i palhnak na tuah lengmang ko lai. Palhnak tuah nolh than lo nak dingah a ttha bikmi lam cu palhnak chimh hi a si.

Cun nangmah chiatha thleidannak lungthin ruangah maw, chimtu le hngalhter tu pakhatkhat ruangah maw ka palh tiah na theih ahcun i remh zau, palhnak theih ko buin i remh duh lo tlukin a chiahrumi ziaza a um ti lo.

Na palhnak kha a donghnak si loin a hramthok a si: Vawleicung i mi hlawhtling le minthang tampi hna khi palhnak um bak in atu i an dirhmun khi a phanmi an um lo. Cun palh ding a ttihmi le vun palh sual tikah zeihmanh tuah ngam ti loin palhnak in a dongmi hna nih hlawhtlinnak an hmu bal lo. Mi tampi cu kan palh tikah thil dang kan tuah ngam ti lo. Voikhat kan palhnak ah khan kan taang peng. Tlikzuamnak ah a tlimi pa nih a tluk sual tikah ka hawile nih an ka lonh tuk cang, mi hmaiah zohchia in ka tlu hoi sual lai tiin a tluknak ah um peng sehlaw, asiloah hnulei ah kir sehlaw zeitindah teinak cu a hmuh khawh lai? Asinain a tluknak in a thawh i amah lonh in a tli liomi hna nak in rang deuh le tthawng deuh in a tlik than ahcun teinak a hmuh ko lai. Na palhnak ah na taan peng ko ahcun zeitikhmanh ah hlawhtlinnak cu na hmu bal lai lo. Na palhnak kha a donghnak a si lo ti philh hlah, voikhat na palh ah na palhnak zawn i palh than ti lo dingin hram naa thok a si. Scientist minthang, Elbert Einstein nih cun “Palhnak a tuah bal lomi cu zeihmanh a thar in aa thok bal lo (A person who never made a mistake never tried anything new)” tiah a ti.

Minung cu palh a hmangmi, asiloah palh a thiammi kan si. Midang zong palh an hmang, kanmah zong kan hmang. Minung umnak ah palhnak um lo phung a si lo. Asinain palh hi thil thalo cu a si lo, a tlaih zia le a hmanzia na thiam ahcun hlawhtlin nak dingah an bawmtu thil ah a cang lai. A luanciami caan ah na rak palhnak nih in temtawn ti hlah seh, hmailei na nunnak zongah midang palhnak tampi na hmuh lai, cu tikah soisel thangchiat, sik le mawhchiat si loin lamdik hmuhsaktu si i zuam. Nangmah hrimhrim kha na palh tikah na palhnak kha cohlang law, cu na palhnak ah taang peng loin na palhnak nih an cawnpiakmi theihnak le fimnak hmanglaw hmailei ah kal ko. Na palhnak tampi kha na hlawhtlin ni ahcun an lawmh tertu an si te lai.

Leave a Comment

Your email address will not be published. Required fields are marked *