MI VA SOI HLAH

MI VA SOI HLAH

Midang soi hi a tha bak lomi a si. Minung hi mah sining le dirhmun tha tein i zoh, i tuaktan le i hmuhfian ahcun midang a soi ngam ding a hohmanh kan um lo.

Tuhrawng online ah holh theihlo kong he pehtlai in pakhat le pakhat i soinak le elnak tete a hung chuak. Hi bantuk Pathian bia ah i soinak le elnak a ummi hi kan caah a thathnemnak a um maw? Asiloah a thatlonak dah a tam deuh?

Minung tampi nih tangka hmuh an duh ruangah thawngpang diklo an thlah tawn. Va um ko seh, vawlei phung a si hei ti ko usih! Asinain mifim le cathiam sang kan pale, kan ule cheukhat nih mipi caah soinak, i hmuhthiam lonak le i elnak a chuak khomi ca kan thlah tawnmi le comment hna ah kan tial tawnmi hi cu ruah a hau! Lungput tenau tuk a si.

Holh theihlo kongah a dik le dik lo kong chim kaa timhmi a si lo. Holh theihlo kong ah pakhat le pakhat kan i soimi tu hi cu a tha bak lo. I soi len a herh hrimrhim lo! A hleice in zumhnak kongah i soi hi a tha lo, hrial ah a tha bik.

Mi soi kan hman tukmi nih hin kan lungput a puitlin lo zia a langhter. Pathian bia cu kanmah le kalning hoih cio in kan zumh/lak ko lai. A dik le dik lo biakhiaktu cu Pathian a si ko.

Cun mi pakhat nih a dik lomi a zumhmi cungah soiselnak nawl kan ngei lo pi, zumh khawhnak nawl a ngei si.

Holh theihlo a uar lomi nih holh theihlo a uarmi hna vancung an kai ahcun kei cu vawlei ah ka um ko lai, hei ti te hna khi cu Khrih lungput a si lo hrimhrim. Cu bantukin holh theihlo a uarmi nih holh theihlo a ngei lomi cu hremhmun bak ah an tla lai ti tehna zong a tenau tukmi lungput a si.

Ahohmanh i soi hlah usih, kanmah le zumhning cio tein kal ko usih. A donghnak i bia a khiaktu cu Pathian a si ko. Kan dailuci (referee) cu Pathian a si. Amah nih bia a khiah tikah a dik le dik lo kan theih te ko lai.

Nang zeitindah na zumh? Kei zeitindah ka zumh? Kan zumhnak aa dangmi/aa khat lomi kongah i soi a hau lo. Kanmah le Pathian kan i pehtlainak tu ah buai usih, midang zumhnak kongah buai hlah usih.

Mi va soi hlah, timi hi Jesuh nih a kan cahtami bia a si (Lk 6:37). Cucaah pumpak kongah siseh zumhnak kongah siseh midang va soi le va hnorsuan le lo tein kanmah sining le zumhning cio in kal ko usih tiah sawm buin….

 

Leave a Comment

Your email address will not be published. Required fields are marked *