ZEIRUANGAH DAH PAUL NIH TIMOTE KHA ZU DIN A FIAL?

ZEIRUANGAH DAH PAUL NIH TIMOTE

KHA ZU DIN A FIAL?

Na paw a fakmi an bawmh nakhnga zu kha tlawmpal in rak ding (ITim 5:23)!

Hi baibal caang hi zu a dingmi hna nih an i cinken khawh ngaimi a si! Zu a dingmi lawng nih si loin Khrihfa upa cheukhat le pastor cheukhat zong nih hi Baibal caang hi an i cherhchan lengmang tawn. Hi Baibal caang kong he pehtlai in hlathlainak (study) ka tuahmi a tawinak tein in hrawmh ve hna ka duh.

ZU & WINE: Baibal ah “zu” tiin a hmannak a um i “mitsur haang (wine)” tiin a hmannak a um. Tuchan ah cun zu le wine hi a dang an si nain Baibal chan lioah cun zu le wine hi aa khatmi an rak si. Hmun cheukhat ah “zu” tiin a hman i hmun cheukhat ah “wine” tiin a hman.

KHUARUAHHAR A SIMI: Paul nih Timite cu a “na pawhfah an bawmh nakhnga zu kha tlawmpal in rak ding” tiah a ti. Hihi Baibal nih zu din a kham lo, tiah ruah khawh a si. Cu lawng a si lo. Cheuhra cheukhat chungin zu nan cawk lai (Deut 14:26). Milkhizadek nih Abraham sinah zu kha laksawng ah a pek (Gen 14:18). Raithawinak ah zu an hman (Num 28:7). A cunglei Baibal caang hna zoh tikah khuaruahhar a si ko. Ziah Baibal nih hin zu din a kham tung lo, zu hi a sual lo pi, ti khawh an si cang.

ZU A RATNAK HRAMPI: A cung i ka langhtermi Baibal caang hna ruangah kan khuaruah a rak har tawnmi le mi tampi nih Baibal nih zu din a kham lo, tiah kan ti tawnnak a ruang cu zu a ratnak hrampi kan theih lo caah a si.

Zu/wine he pehtlai in Hebru biafang pahnih a um. Pakhatnak: Shekar! A sullam cu rittertu (antoxicant), zuhaang (alcoholic liguor) tinak a si. Pahnihnak: Yayin! Yayin timi ahhin phunhnih in a um. Phunkhat cu “uammi (fermented)” ti a si i phunkhat cu “uam lomi, phundang in tuahmi (unfermented)” ti a si.

Uami (fermented) hi mitsur haang in tuahmi a si i uammi a si caah a sinak cu rittertu (shekar) zu he aa khatmi a si. Uam lomi, asiloah phundangin tuahmi zu/wine cu rittertu a si lo, ritnak ca hrimhrim ah tuahmi a si lo. Sii caah tuahmi a si. Ritnak zu (shekar & fermented wine) hi Pathian nih a duh lomi a si. Uam lomi (unfermented wine) hi sii caah thianghlim tein tuahmi a si, ritnak a si lo, damnak a si.

Paul nih Timote sinah sin a fialmi cu ritnak zu khi a si lo, sii caah tuahmi zu/wine tu khi a si. Cheukhat cheukhat in cawk khawhmi, Melkhizadek nih Abraham sinah a pekmi le raithawihnak caah hmanmi zu hna zong khi “shekar & uammi zu” khi a si lo, sii caah tuahmi zu khi a si.

Cu ruangah Paul nih Timote sinah zu din a fialmi cu zu din, zurit hi a sual lo ruangah a si lo. Baibal nih zu din a kham lo ruangah a si lo. Zu/wine hi phunhnih a um. Ritnak zu/wine le sii caah hmanmi zu/wine an si. Paul nih Timote sinah din a fialmi cu sii caah hmanmi/sermi zu/wine hi a si.

Theihternak: Baibal nih zu din a thatlonak kong a chimmi le zu din buin khamhnak co a si lai lonak kong kan peh than te lai.

Leave a Comment

Your email address will not be published. Required fields are marked *