CUNGCAWI RAWLDAWR (Dinner in the Sky)

CUNGCAWI RAWLDAWR

(Dinner in the Sky)

Hi rawldawr hi Belgium ram ah a ummi a si. Pe 150 sangin an cawi, asiloah an thlai i cu chungah cun rawl an zuar. Forbes Mekazin nih vawleicung ah khuaruahhar bik a simi rawldawr 10 an thimmi chungah aa tel vemi a si. Atu tiangah Dinner in the Sky rawldawr cu ram 15 ah an on khawh cang. Paris, Dubai le Las Vegas khuapi zongah an tuah. Hi rawldawr hi Belgium i pehtlaihnak lei company ngeitu David Ghysels le bungee jumping programee a tuahtu Stefan Kerkhofs nih an thokmi a si.

Hi hna pahnih nih hin 2007 ah khan Europe rawldawr tuahtu company a simi Jeunes caah phundang ngai a simi hi rawldawr hi an tuahmi a si. Hi rawldawr an tuah hnuah vawleicung hmunkip in hi bantuk rawldawr hmun tampi tuah dingin pehtlaihnak an rak tuah hna. Cuticun Belgium lawngah si loin ram dangdang zongah cungcawi rawldawr tuah dingin biachahnak an ngei.

“Hi bantuk hi a buaithlak duh ngai ve, a sinain mi tampi cu rawldawr sawhsawh nih a simh hna i phundangte a simi rawldawr ah ei an duh cang, tiah ka ruah” tiah David Ghysels nih a chim.

Kum 2008 ah khan Las Vegas i mirum pakhat a simi Michael Hinden le a nupi cu thilri hmuhsaknak puai ah an ra i cungcawi rawldawr cu an hmuh. Cungcawi rawldawr ah cun a va lut i rawl a ei. A nuam tuk le a ṭha tuk in a theih caah kumthar ah a hawile he cungcawi rawldawr ah ei dingin timhtuahnak an ngei. Kum 2009 ah cun Michael Hinden le a nupi nih Las Vegas ah cungcawi rawldawr cu an tuah ve. Cu rawldawr cu 2013 ah Las Vegas khuapi i City Center pawngte ah an ṭhial. Hi rawldawr tuahnak ah US $ 4 million an dih.

Dinner in the Sky ah raw lei a duhmi hna cu hmasa bik ah ṭhutnak ah an ṭhutter hna i taisawm an sawmhter hna. Cun ṭha tein an chek ta hnuah pe 150 sangin an cawi hna. Rawldawr chungah minung 22 ṭhut khawhnak cabuai pakhat le rianṭuantu minung pali an um.

Hi rawldawr ah hin phungphai an ngei. Kum 13 in a tanglei ngakchia le nau a pawi liomi luh an sianh hna lo. Cun phone le hmanthlaknak dah ti lo thildang i ken a ngah lo.

Atu ahcun India le Malaysia zongah a um cang. Zohkhenhning hi Economy , Business , First class tiin phunthum a um. Suimilam pakhat chungah Myanmar tangka in 130,000 in 330,000 tiang an hauh, tiah theih a si.

Ref: Thuta Zone

Leave a Comment

Your email address will not be published. Required fields are marked *